ਚੰਡੀਗੜ੍ਹ | 10 ਅਕਤੂਬਰ 2026
ਅਮਰੀਕਾ ਵਿੱਚ ਮੌਤ ਦੀ ਸਜ਼ਾ ਦੇ ਲਾਈਵ ਪ੍ਰਸਾਰਣ ਦੀ ਯੋਜਨਾ ਨੇ ਕੌਮਾਂਤਰੀ ਪੱਧਰ ’ਤੇ ਨਵੀਂ ਬਹਿਸ ਛੇੜ ਦਿੱਤੀ ਹੈ। ਅਮਰੀਕੀ ਫੌਜ ਦੇ ਸਾਬਕਾ ਮੇਜਰ ਨਿਦਾਲ ਹਸਨ ਨੂੰ 3 ਦਸੰਬਰ ਨੂੰ ਟੈਕਸਾਸ ਦੇ ਫੋਰਟ ਹੁੱਡ ਫੌਜੀ ਅੱਡੇ ’ਤੇ ਫਾਇਰਿੰਗ ਸਕੁਐਡ ਰਾਹੀਂ ਮੌਤ ਦੀ ਸਜ਼ਾ ਦਿੱਤੇ ਜਾਣ ਦੀ ਤਾਰੀਖ ਤੈਅ ਕੀਤੀ ਗਈ ਹੈ। ਪੈਂਟਾਗਨ ਦੀ ਯੋਜਨਾ ਮੁਤਾਬਕ ਇਸ ਕਾਰਵਾਈ ਦਾ ਲਾਈਵ ਪ੍ਰਸਾਰਣ ਕੀਤਾ ਜਾ ਸਕਦਾ ਹੈ। ਜੇਕਰ ਅਜਿਹਾ ਹੁੰਦਾ ਹੈ, ਤਾਂ ਇਹ ਅਮਰੀਕਾ ਵਿੱਚ ਆਪਣੀ ਕਿਸਮ ਦਾ ਪਹਿਲਾ ਜਾਣਿਆ-ਪਛਾਣਿਆ ਮਾਮਲਾ ਹੋਵੇਗਾ। ਹਾਲਾਂਕਿ, ਲਾਈਵ ਪ੍ਰਸਾਰਣ ਅਤੇ ਸਜ਼ਾ ਨੂੰ ਲਾਗੂ ਕਰਨ ਬਾਰੇ ਅੰਤਿਮ ਫ਼ੈਸਲੇ ’ਤੇ ਅਜੇ ਸਵਾਲ ਬਣੇ ਹੋਏ ਹਨ।
ਕੀ ਹੈ ਪੂਰਾ ਮਾਮਲਾ?
ਅਮਰੀਕੀ ਰੱਖਿਆ ਮੰਤਰੀ ਪੀਟ ਹੇਗਸੇਥ ਨੇ ਕਿਹਾ ਕਿ ਲੋਕਾਂ ਨੂੰ ਇਹ ਦੇਖਣ ਦਾ ਮੌਕਾ ਮਿਲਣਾ ਚਾਹੀਦਾ ਹੈ ਕਿ ਅਜਿਹੇ ਗੰਭੀਰ ਅਪਰਾਧਾਂ ਦੇ ਕੀ ਨਤੀਜੇ ਹੁੰਦੇ ਹਨ। ਇਸ ਐਲਾਨ ਤੋਂ ਬਾਅਦ ਮੌਤ ਦੀ ਸਜ਼ਾ ਨੂੰ ਜਨਤਕ ਤੌਰ ’ਤੇ ਦਿਖਾਉਣ ਦੀ ਨੈਤਿਕਤਾ, ਕਾਨੂੰਨੀ ਅਧਿਕਾਰਾਂ ਅਤੇ ਮਨੁੱਖੀ ਅਧਿਕਾਰਾਂ ਬਾਰੇ ਚਰਚਾ ਤੇਜ਼ ਹੋ ਗਈ ਹੈ।
2009 ਵਿੱਚ ਫੋਰਟ ਹੁੱਡ ਫੌਜੀ ਅੱਡੇ ’ਤੇ ਕੀ ਹੋਇਆ ਸੀ?
5 ਨਵੰਬਰ 2009 ਨੂੰ ਅਮਰੀਕੀ ਫੌਜ ਦੇ ਮਨੋਚਿਕਿਤਸਕ ਮੇਜਰ ਨਿਦਾਲ ਹਸਨ ਨੇ ਟੈਕਸਾਸ ਦੇ ਫੋਰਟ ਹੁੱਡ ਫੌਜੀ ਅੱਡੇ ’ਤੇ ਗੋਲੀਬਾਰੀ ਕੀਤੀ ਸੀ। ਇਸ ਘਟਨਾ ਵਿੱਚ 13 ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ 32 ਹੋਰ ਜ਼ਖ਼ਮੀ ਹੋਏ ਸਨ। ਗੋਲੀਬਾਰੀ ਦੌਰਾਨ ਹਸਨ ਵੀ ਜ਼ਖ਼ਮੀ ਹੋ ਗਿਆ ਸੀ, ਜਿਸ ਕਾਰਨ ਉਹ ਕਮਰ ਤੋਂ ਹੇਠਾਂ ਅਧਰੰਗ ਦਾ ਸ਼ਿਕਾਰ ਹੋ ਗਿਆ।
ਸਾਲ 2013 ਵਿੱਚ ਫੌਜੀ ਅਦਾਲਤ ਨੇ ਉਸ ਨੂੰ ਕਤਲ ਅਤੇ ਕਤਲ ਦੀ ਕੋਸ਼ਿਸ਼ ਦੇ ਦੋਸ਼ਾਂ ਵਿੱਚ ਦੋਸ਼ੀ ਕਰਾਰ ਦਿੰਦਿਆਂ ਮੌਤ ਦੀ ਸਜ਼ਾ ਸੁਣਾਈ ਸੀ।
ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਪਹਿਲੀ ਵਾਰ ਫਾਇਰਿੰਗ ਸਕੁਐਡ ਰਾਹੀਂ ਸਜ਼ਾ
ਅਮਰੀਕੀ ਫੌਜ ਵਿੱਚ ਇਹ 1961 ਤੋਂ ਬਾਅਦ ਪਹਿਲੀ ਫਾਂਸੀ ਜਾਂ ਮੌਤ ਦੀ ਸਜ਼ਾ ਦਾ ਮਾਮਲਾ ਹੋਵੇਗਾ। ਇਸ ਤੋਂ ਇਲਾਵਾ, ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਫਾਇਰਿੰਗ ਸਕੁਐਡ ਰਾਹੀਂ ਦਿੱਤੀ ਜਾਣ ਵਾਲੀ ਇਹ ਪਹਿਲੀ ਅਮਰੀਕੀ ਫੌਜੀ ਮੌਤ ਦੀ ਸਜ਼ਾ ਹੋਵੇਗੀ।
ਲਾਈਵ ਪ੍ਰਸਾਰਣ ’ਤੇ ਉੱਠੇ ਸਵਾਲ
ਇਸ ਯੋਜਨਾ ਦੀ ਅਮਰੀਕਾ ਵਿੱਚ ਵੀ ਆਲੋਚਨਾ ਹੋ ਰਹੀ ਹੈ। ਕੁਝ ਆਗੂਆਂ ਅਤੇ ਮਨੁੱਖੀ ਅਧਿਕਾਰ ਸੰਗਠਨਾਂ ਦਾ ਕਹਿਣਾ ਹੈ ਕਿ ਮੌਤ ਦੀ ਸਜ਼ਾ ਨੂੰ ਲਾਈਵ ਦਿਖਾਉਣਾ ਇਸ ਨੂੰ ਜਨਤਕ ਤਮਾਸ਼ੇ ਵਿੱਚ ਬਦਲ ਸਕਦਾ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੀ ਕਿਹਾ ਹੈ ਕਿ ਲਾਈਵ ਪ੍ਰਸਾਰਣ ਬਾਰੇ ਫ਼ੈਸਲਾ ਅਜੇ ਵਿਚਾਰ ਅਧੀਨ ਹੈ। ਇਸ ਲਈ 3 ਦਸੰਬਰ ਨੂੰ ਪ੍ਰਸਾਰਣ ਹੋਣਾ ਅਜੇ ਪੱਕਾ ਨਹੀਂ ਮੰਨਿਆ ਜਾ ਸਕਦਾ।
